Hai munchu munchu tiempu, en viniendo la seronda, los ríos y ríes asturines enllenábense de milenta pexiquinos tresparente que yeren l'allegría de la xente llariego. Esos pexiquinos llamaos angules, atrayíos pola lluz de los faroles, averábanse a los pescadores que los recoyíen colos sos serazos.
Col pasu de los años, les angules fueron sumiéndos hasta casi desapaecer de los nuesos calces y con elles los anguleros y anguleres. Ún dellos, sicasí, siguía viniendo a pescar toles nueches d'escuru enantes de Navidá pa poder repartir ente los más necesitaos les perres que sacaba na rula pola venta d'esos pexiquinos.
La natura, como si de maxa se tratare, reconpensaba'l so esfuerciu y solidaridá enllenando d'angula'l so serazu una y otra vez fasta llegar l'aborecer.
Agora cunten los más vieyos y vieyes del llugar qu'esti paisanu de bon corazón que tol mundu llama L'Anguleru, vive na Mar de los Sargazos curiando de les angules y anguiles. Y unos díes enantes de Navidá, coincidiendo col solsticiu d'iviernu torna p'Asturies pa pescar angules que viende pa mercar regalinos que reparte en nuechebona montáu na so lancha l'Angulina.
Pues agora vamos a presentavos a los sos ayudantes: LOS LLENDAORES DE RÍU, al traviés del trabayu fechu por Victor Raúl Pintado Rey -Vitu-
L'Anguleru ye un pescador asturianu bonal y amorosiegu. Vive na Mar de los Sargazos curiando del mediu marín. N'avientu torna a Asturies pa pescar angules. Coles perres que saca de vendeles na rula, merca llabionaes y regalinos que reparte en nuechebona, montáu nel so chalanu, llamáu "l'Angulina".
Los llendadores del ríu, tamién llamaos agavitadores del Anguleru son los lleales ayudantes del Anguleru. Encánguense de recoyer les cartes y repartir xunto a elli, los regalos de navidá. Amás ellos tienen munchu trabayu durante tou l'añu, yá que son los encargaos de portexer los calces de los regueros, regatos, ríos y ríes asturianos, desenvolviendo llavores de llimpieza y repoblamientu. Si quies collaborar con ellos na defensa y caltenimientu de la natura, tú tamién pues llegar a ser una o ún d'ellos. L'Anguleru ta peragradecíu del so llabor
L'agasayu. Si queréis que vos traiga la garulla y dalgún detallín guapu, vais tener que portavos perbién demientres tol añu y dexar al llau del nataliegu, xunto al nacimientu o a los pies del árbol de nadal, un gorru d'esos que tanto y presten al Anguleru. Tamién podeis dexa-y a él y a los llendadores, daqué pa picar y dalgo de bébora (en nuechebona tienen munchu trabayu y tienen que reponer fuercies pa llegar a tolos neños y neñes asturianes).
La Foguera'l Nataliegu, como yá facíen los nuesos antepasaos (los ástures), L'Anguleru y los Llendadores del Ríu/a siguen festexando la tradicional Foguera'l Nataliegu, quemando un grnadísimu tueru de carbayu. D'ellí va nacer el llume sagrao del Nataliegu colo que van prender el farolín máxicu de carburu que va a enllenar de lluz ya ilusión la navidá asturiana.
El farolín máxicu, la lluz qu'emite'l so llume sagrao, estra de maxa tolo qu'alluma, enllenando d'angula'l serazu L'Anguleru, faciendo esnalar el so chalanu o tresformando les cañes de les y los llendadores en ferramientes fantástiques que puen subir l'agasayu a los edificios más altos qu'enxamás pueas imaxinar.
Carta / dibuxu pa L'Anguleru: (calca na imaxe pa descargalos)
Facebook l'Anguleru
Languleru.blog (Victor Rual Pintado)
languleru.com
L'Anguleru
Acuariu de Xixón
