El Conciertu pola Oficialidá qu'entama cada añu la Xunta pola Defensa de la Llingua Asturiana llega a la XXIX edición y vuelve axuntar reivindicación y folixa. Esti añu la cita con ún de los principales festivales musicales d'Asturies, va ser el 17 de xunu nel Parque Inglés de Xixón, a partir de les 19.00 hores, van volver vivise más de siete hores de bona música al mesmu tiempu que s’esixen los derechos que tien que tener la llingua asturiana n'Asturies.
El Conciertu pola Oficialidá ye un conciertu reivindicativu entamáu pola Xunta pola Defensa de la Llingua Asturiana pa reclamar la oficialidá pal asturianu. Vien celebrándose dende 1989 en dellos llugares de la xeografía asturiana
LaKadarma ye un proyectu musical qu'aporfia pol desarrollu de la música tradicional asturiana apurriéndo-y sonoridaes y arreglos nuevos a la gaita asturiana, recibiendo pa eso influencies de dellos estilos. L'agrupación formóse en febreru del 2012 baxo la dirección musical de los hermanos Rodrigo y Andrea Joglar. Compónse de músicos procedentes de dellos ámbitos de la música tradicional asturiana, tanto del mundu de les bandes de gaites, como de los grupos de música folk, amás de gaiteros solistes o escolinos de la Escuela Municipal de Música de Nava. Nes sos actuaciones, LaKadarma trata d'ufrir un espectáculu desenfadáu, espontaneu y dinámicu.
“Tarde en danza”
“Tarde en danza”
Banda del occidente asturianu que fai música tradicional del Navia-Eo, siempre buscando los sones más folixeros. Los miembros del grupu son Pepín de Muñalén (saxofón), Miguel Rodríguez Monteavaro (redoblante), Marga Lorences (acordión), Diego Pangua (bombu y trompa) y Andrés de Bual (gaita).
Cantaruxare
Cantaruxare
Paulino, Diego, Ambás y Ramsés formen Cantaruxare, grupu que vien a recoyer la tradición musical d'homes pandereteros n'Asturies.
Herbamora
Herbamora
Herbamora ye un grupu de pandereteres non convencional que nació nel 2003. Nel 2007 publicaron el so primer discu,¡Sali, l.lluna!, cola discográfica L'Aguañaz. Col tema en gallego-asturianu “Nosh” ganaron el Premiu al Meyor Cantar.
Rodrigo Cuevas
Rodrigo Cuevas
Rodrigo Cuevas ye cantante, compositor, acordionista y percusionista con formación musical académica que propón una revisión folk risondera y enraigonada na tradición asturiana. Con un discursu que ruempe les llindes de la corrección, el so éxitu “Ritmu de Verdiciu” foi'l cantar del branu pasáu y agora presenta'l so espectáculu nuevu, “El Mundo por Montera”, una llamada d'atención sarcástica en formatu de zarzuela bufa fecha dende Asturies y pal mundu. Un show nuevu nel que mez el so universu: un mundu tradicional, rural, escéntricu, pero tamién urbanu, críticu y tecnolóxicu.
Spanta la Xente
Spanta la Xente
Spanta la xente ye ún de los grupos con más discos vendíos n'Asturies. Nel 2008 sacaron el so primer discu, Fíos d'esta tierra, un trabayu producíu pol históricu Chus Pedro, que vendió más de 2.500 copies y que con “Letavia" mereció'l Premiu AMAS al meyor cantar folk. Amás, con “Canciu'l mineru” tuvieron nominaos al meyor cantar n'asturianu nos Premios de la Música española. El grupu consolidóse conAlienda, que siguió'l camín marcáu nel trabayu anterior, y volvieron trunfar con Revolucionando, un discu que vendió nuna selmana nada menos que 1.000 copies y onde suena otra vez el so mayor éxitu, “Díes de barricá”, una lletra que se convirtió nel himnu de les lluches mineres.
Dixebra
Dixebra
Nesti 2017, una de les bandes más históriques de la escena sonora asturiana cumple 30 años ininterrumpíos de rock n'asturianu. Y por cuenta d'esto entamen delles actividaes dirixíes a conmemorar tou esti tiempu de música y compromisu. Ente eses iniciatives ta'l facer una xira bien curiosa col títulu de Tour 87-17, cola que van tocar per munchos sitios d'Asturies y qu'agora lleven al escenariu del Conciertu pola Oficialidá. D’igual manera, el grupu avilesín va entrar n’estudiu pa grabar tres temes dientro del proyectu musical que llamen Dalgo vieyo, dalgo nuevo, dalgo emprestao.
Misiva
Nacida nel 2009, Misiva ye una banda moscona qu'edita los dos discos con un formatu novedosu: los cantares interprétense con versión n’asturianu y en castellanu. Esta filosofía billingüe surde cola mira de poner les dos llingües a la mesma altura, al empar que s’avera la llingua asturiana a la xente que la desconoz. Depués de participar nel FestiAMAS y representar a la llingua asturiana nel festival EHrZ, concursu de grupos de música de naciones ensin Estáu y en llingües minorizaes del Euskal Herria Zuzenean, Misiva publicó nel 2015 el so quintu discu, Invencibles, que los consolidó na escena musical asturiana.
Misiva
Nacida nel 2009, Misiva ye una banda moscona qu'edita los dos discos con un formatu novedosu: los cantares interprétense con versión n’asturianu y en castellanu. Esta filosofía billingüe surde cola mira de poner les dos llingües a la mesma altura, al empar que s’avera la llingua asturiana a la xente que la desconoz. Depués de participar nel FestiAMAS y representar a la llingua asturiana nel festival EHrZ, concursu de grupos de música de naciones ensin Estáu y en llingües minorizaes del Euskal Herria Zuzenean, Misiva publicó nel 2015 el so quintu discu, Invencibles, que los consolidó na escena musical asturiana.
